“Şagirdin dərsə gecikməsi, ev tapşırığını yerinə yetirməmək, böyüklərə qarşı nəzakətsiz davranış birinci dərəcəli davranış pozuntusudur. Lakin yüngül səviyyə olsa belə, çoxlu sayda təkrar olunursa, məsələn, şagird təkrar-təkrar dərsə gecikirsə, bu pozuntu artıq növbəti dərəcəyə keçir. Çox yüngül davranış qaydalarının pozulması daha ağır davranış pozuntusuna gətirib çıxarır”.
“Qafqazinfo” xəbər verir ki, bunu Elm və Təhsil Nazirliyinin Ümumi və məktəbəqədər təhsilin təşkili və idarəolunması şöbəsinin müdiri Elnur Əliyev deyib.
O qeyd edib ki, təhsil müəssisələrində aparılan monitorinqlərin nəticələri göstərib ki, yeni qaydaların hazırlanmasına ehtiyac var. Təhsil mütəxəssisləri, məktəb direktorları, xarici ekspertlər cəlb olunmaqla, həmçinin xarici təcrübə araşdırılmaqla “Şagirdlərin məktəbdaxili nizam-intizam qaydaları” layihəsi hazırlanıb.
Şöbə müdirinin sözlərinə görə, həmin layihədə 6 bölmə ayrılıb. Davamiyyət, punktuallıq, şagird təhlükəsizliyi, öyrənmə prosesində qaydalar, etik davranış və s. bölmələr bura aiddir.