Xəbər verdiyimiz kimi, ötən gün Azərbaycan cüdo yığmasının böyük məşqçisi Mehman Əzizov işdən azad edilmişdi.

“Qafqazinfo”nun əldə etdiyi məlumata görə, artıq onun yerinə təyinat da reallaşıb.

Hələ tam rəsmiləşməsə də, bu posta federasiyanın baş katibi Rəşad Rəsullunun əmisi oğlu, gənclərdən ibarət yığmada köməkçi məşqçi işləyən Abdulhaq Rəsullunun təyin olunduğu bildirilir. Bu təyinatın isə yaxın günlərdə açıqlanacağı deyilir.

Məsələ ilə bağlı Azərbaycan Cüdo Federasiyasına sorğu göndərsək də, cavab ala bilmədik. Federasiyanın mətbuat xidmətindən bildirildi ki, hər şey rəsmi şəkildə açıqlanacaq.

Qeyd edək ki, Mehman Əzizov ötən gün səbəb bildirilmədən işindən azad olunub. O, cüdo yığması ilə müqavilə imzalayarkən sözləşmədə federasiya tərəfindən istənilən vaxt işdən çıxarıla biləcəyi bəndi yer alıb. 

***

Azərbaycan Cüdo Federasiyası açıqlama yayaraq Mehman Əzizovun işdən ayrıldığını təsdiqləyib. Azərbaycan Cüdo Federasiyası məşqçi Mehman Əzizovla əməkdaşlığı davam etdirməmək qərarı verib və qanunvericiliyə uyğun olaraq, müqaviləyə xitam verib.

Rüstəm Alimli böyüklərdən ibarət milli komandaya məşqçi təyin edilib. O, həm də yeniyetmələrdən ibarət yığmanın baş məşqçisi kimi fəaliyyətini davam etdirəcək.