Ötən gün Prezident İlham Əliyev Böyükşor–Pirşağı avtomobil yolunun layihələndirilməsi və tikintisi ilə bağlı tədbirlər haqqında Sərəncam imzalayıb. Sərəncamla Bakı şəhərində nəqliyyat sıxlığının azaldılması məqsədilə uzunluğu 12,7 km olan altı hərəkət zolaqlı Böyükşor-Pirşağı avtomobil yolunun layihələndirilməsi və tikintisi üçün Azərbaycan Respublikasının 2023-cü il dövlət büdcəsində nəzərdə tutulmuş Azərbaycan Respublikası Prezidentinin ehtiyat fondundan Azərbaycan Avtomobil Yolları Dövlət Agentliyinə ilkin olaraq 4,7 milyon manat ayrılıb. Böyükşor-Pirşağı yolu Bakı nəqliyyatının tıxac problemində nə qədər effektiv olacaq?

Mövzu ilə bağlı Milli Məclisin deputatı Fazil Mustafa açıqlamasında bildirib ki, yeni layihənin Bakı şəhəri üzrə tıxacla yüklənən bəzi yollar üçün olduqca effektiv olması gözlənilir.

“Böyükşor-Pirşağı yolu, əslində, müəyyən yükün azalması üçün nəzərdə tutulub. Bildiyiniz kimi, Zabrat yolu olduqca yüklənmiş bir yoldur və burada tıxacların səviyyəsi ildən-ilə artmaqdadır. Buna görə də hamının istifadə edə biləcəyi alternativ yola ehtiyac var. Bu yolda yükün paylanması olduqca vacibdir. Azərbaycan Avtomobil Yolları Dövlət Agentliyi gərgin və vacib layihələr yerinə yetirir. Xüsusilə də, Bakı şəhərində, regionlarda, həmçinin işğaldan azad olunmuş ərazilərdə çox böyük yol infrastrukturunun qurulmasını təmin edir. Bu layihə uzun müddətdir nəzərdə tutulan amma artıq yeni imkanlarla həyata keçirilməsi düşünülən bir layihədir. Hesab edirəm ki, layihənin gerçəkləşdirilməsi, xüsusilə Zabrat yolunun yükünü əhəmiyyətli dərəcədə azaldacaq. Bir çox insanlar Pirşağıya getmək üçün bu yoldan istifadə edirdilər. Eyni zamanda, Mehdiabad yolu da daim tıxacla yüklənən yollardan biridir və yeni layihə bu yola da müsbət təsir edəcək”.

Deputat əlavə olaraq qeyd edib ki, Bakıda yol infrastrukturunun əsaslı şəkildə təkmilləşdirilməsinə ehtiyac var. Böyükşor-Pirşağı yolunun böyük hissəsinin boş ərazilərdən keçməsi də söküntülərin az olacağından xəbər verir ki, bu nüans da layihənin daha uğurlu olması deməkdir.|referans.az|