“İsrail və Qəzza zolağı status-kvona qayıda bilməyəcək, İsrailə HƏMAS-ın təkrar hücumlarından qaçmağa imkan verəcək yeni mexanizm tapmaq lazımdır”.

Yeniavaz.com xəbər verir ki, bu fikirləri NBC telekanalının efirində ABŞ dövlət katibi Entoni Blinken deyib.

Blinkendən İsrailin Qəzza zolağı ilə bağlı strategiyasının nə olduğu və münaqişə bitəndə onu kimin idarə edəcəyi soruşulub.

“Düşünürəm ki, biz iki şeyi başa düşürük: biz status-kvoya qayıda bilmərik, onlar HƏMAS-ın etdiklərini təkrarlaya biləcəyi status-kvoya qayıda bilməzlər”, - Blinken cavab verib.

O, İsrailin Qəzzaya nəzarəti ələ keçirmək niyyətində olmadığını vurğulayıb.

Blinken bildirib ki, münaqişə sona çatdıqdan sonra Qəzzanın necə idarə ediləcəyi ilə bağlı işə indidən başlamaq lazımdır.

Qeyd edək ki, “Bloomberg” daha əvvəl mənbələrə istinadən xəbər vermişdi ki, ABŞ və İsrail BMT-nin dəstəyi və ərəb dövlətlərinin iştirakı ilə Qəzza zolağında müvəqqəti hökumətin yaradılması imkanını müzakirə edir. Məlumata görə, tərəflər arasında müzakirələr ilkin mərhələdədir və Fələstin-İsrail münaqişəsinin inkişafından, o cümlədən İsrail qoşunlarının quru əməliyyatından asılı olacaq.

CNN daha əvvəl bildirmişdi ki, ABŞ və müttəfiqləri İsrail rəsmiləri ilə şəxsi söhbətlərində onları Fələstin anklavında quru əməliyyatı keçirməkdən çəkindirmir, əksinə, Qəzza zolağının gələcək inkişafı ilə bağlı uzunmüddətli strategiyanı nəzərdən keçirməyi xahiş edir.