Son zamanlar Azərbaycan mətbuatında Ermənistanın Baş naziri Nikol Paşinyanın Qarabağ separatçılarından Bakıya təzyiq kimi istifadə etdiyi barədə şərhlərə rast gəlinir. Bildirilir ki, Paşinyan bunun üçün seperatçıların ilk “müdafiə naziri” olan Samvel Babayan və seperatçı rejimin “prezidenti” Samvel Şahramanyan arasındakı ziddiyətlərin dərinləşməsi üçün şərait yaradır.

Bu məsələyə münasibət bildirmək üçün Yeniavaz.com-un guşə yazarı Ürfan Məmmədliyə müracət etdik.

O belə düşünmədiyini dedi: “Hesab edirəm ki, Paşinyanın siyasəti Ermənistanın 29,8 min kvadratkilometrlik ərazisini xilas edib burada müstəqil, demokratik dövlət qurmağa yönəlib. Bu yolda onun qarşısında duran ən böyük əngəl Qarabağ və orada yaşayan ermənilər və Ermənistanın Rusiyanın nüfuz dairəsinində olmasıdır.

Bu əngəllərdən biri və ən önəmlisi indi aradan qalxıb. Əslində Qarabağ problemi Paşinyan üçün də həll olunub. Verdiyi açıqlamalarda, bəyanatlarda Qarabağ haqqında danışsa da o özünü Qarabağsız daha rahat hiss edir, hətta daha cəsarətli çıxışlar edir, siyasətinin Rusiyanın nüfuz dairəsindən çıxmağa yönəldiyini gizlətmir.

Belə bir şəraitdə Paşinyan Qarabağ separatçılarını gündəmdə saxlamaqla başına yeni dərd aça bilər. Ağıllı siyasətçinin belə bir yolu tutması inandırıcı deyil. Paşinyan indi özünü tamamilə Rusiyanın nüfuz dairəsindən uzaqlaşmağa kökləyib. Qarabağ haqqındakı açıqlamaları isə daxili auditoriyaya yönəlmiş gedişlərdir ki, bu da daxildəki revanşistlərin və 5-ci kolonun güclənməsinin qarşısını almağa hesabılanıb”.