Azərbaycan Birləşmiş Millətlər Təşkilatının İnsan Məskənləri Proqramına (UN-HABITAT) bir milyon ABŞ dolları ayırır. 

44Gun.Az xəbər verir ki, bu barədə Prezident İlham Əliyev müvafiq sərəncam imzalayıb.

Dövlət başçısının saytında dərc olunan sərəncama əsasən, dünyada dayanıqlı şəhərlərin inkişafı istiqamətində qarşılıqlı faydalı əməkdaşlığın genişləndirilməsinə, eləcə də bu kontekstdə sülh və təhlükəsizliyin möhkəmləndirilməsinə dəstək məqsədilə vəsait ayrılır.

Vəsait 2023-cü il dövlət büdcəsində nəzərdə tutulmuş Azərbaycan Prezidentinin Ehtiyat Fondundan ayrılacaq. Azərbaycan Respublikasının Maliyyə Nazirliyinə sərəncamda göstərilən məbləğdə maliyyələşməni təmin etmək, Nazirlər Kabinetinə isə bu sənəddən irəli gələn məsələləri həll etmək tapşırılıb.