Son günlər sosial şəbəkələrdə və bəzi xəbər saytlarında ikinci əl avtomobil bazarında kəskin qiymət artımının olması ilə bağlı məlumatlar dərc olunur. Belə ki, qeyd olunan məlumatlara əsasən, sentyabr ayının əvvəlindən ikinci əl avtomobillərin gözəçarpacaq dərəcədə bahalaşması iddia edilir.

Mövzu ilə bağlın iqtisadçı-ekspert Emin Qəribli Referans.az-a danışıb. Ekspert qiymət artımının səbəblərindən danışıb.

“Bu artımı yaradan bir-neçə səbəb var. Məlum olduğu kimi, bir müddət öncə ölkədə olan köhnə avtomobillərlə bağlı müəyyən qadağalar tətbiq olunmuşdu. Bu səbəbdən də orta və aşağı gəlirli vətəndaşlar daha çox ili köhnə olan və yanacaq baxımından daha sərfəli hesab olunan maşınlara yönəldi. Bu səbəbdən də bu cür maşınlara tələbat artıb. Belə olduqda isə, təbii ki, qiymətlər artmağa başlayır. Hesab edirəm ki,  avtomobil bazarındakı bu vəziyyət bir müddət bu cür davam edəcək”.

Nəqliyyat eksperti Eldəniz Cəfərov isə ikinci əl avtomobillərlə bağlı qiymətlərin kəskin sürətdə artmadığını və bunun şaiyə olduğunu deyib.

“Hal-hazırda ikinci əl avtomobil bazarında qiymətlərin kəskin yüksəlməsi ilə bağlı xəbərlər şaiyədir. Qiymət kəskin yüksəlməyib. İkinci əl avtomobillərlə bağlı bahalaşma son dəfə aprel-may ayında özünü göstərmişdi. Qiymətlərin yüksəlməsi mövsümlə əlaqədar olaraq təxminən 5 faiz civarında olur, bu isə kəskin artım demək deyil”.