Ötən gün Ermənistan silahlı qüvvələrinin birləşmələri tərəfindən Ağdam rayonunun iriçaplı silahlardan atəşə tutulması nəticəsində yaralanan ekskavator operatoru Mehman Həsənovun vəziyyəti stabildir.

Qəlpə yaraları alan Mehman Həsənov Ağdam rayon mərkəzi xəstəxanasına yerləşdirilib. Sağ diz nahiyəsinin və sol dirsək nahiyəsinin qəlpə yaralanması diaqnozu ilə gətirilən M.Həsənovun yaraları cərrahi işlənilib. Lazımı tibbi yardım göstərilib. Hazırda vəziyyəti stabil olduğu, müalicəsinin davam etdirildiyi bildirilir.

Mehman Həsənov APA-ya deyib ki, ərazidə bərpa-quruculuq işləri görən zaman ermənilərin atdığı top mərmisi partlayıb və o, qəlpə yarası alıb.

Mehman Həsənov partlayış nəticəsində dirsək və diz nahiyəsindən xəsarətlər aldığını bildirib: "Ekskavatorçuyam, Ağdamda bərpa-quruculuq işləri görürdük. Həmişəki kimi işimi görürdüm. Anidən partlayış səsləri eşitdim. Həmin vaxt ekskavatorun içərisində idim. Nə baş verdiyini bilmədim. Texnikadan yerə düşən kimi qəlpə yaraları aldım. Texnikaya da ziyan dəyib”.

Qeyd edək ki, sentyabrın 19-da Azərbaycanın Qarabağ bölgəsində cinayətkar birlik halında qanunsuz yaradılmış Ermənistan silahlı qüvvələrinin birləşmələri tərəfindən Ağdam rayonunun iri çaplı silahlardan, o cümlədən minaatanlardan atəşə tutularaq törədilən terror hücumu nəticəsində ərazidə bərpa quruculuq işləri aparan şirkətlərdən birinin ekskovator operatoru 1992-ci il təvəllüdlü mülki şəxs Həsənov Mehman Fikrət oğluna çoxsaylı qəlpə xəsarətləri yetirilməklə qəsdən öldürülməsinə cəhd edilib.

Faktla bağlı Baş Prokurorluq tərəfindən Cinayət Məcəlləsinin 29, 120.2.11, 29, 120.2.12 (terrorçuluqla əlaqədar, milli ədavət və düşmənçilik niyyətilə adam öldürməyə cəhd) 214.2.1, 214.2.3 (mütəşəkkil dəstə tərəfindən odlu silahdan, partlayıcı maddələrdən və qurğulardan istifadə etməklə terrorçuluq) 279.3-cü (qanunvericliklə nəzərdə tutulmayan silahlı birləşmələr və qrupların tərkibində müəssisələrə, təşkilatlara və ayrı-ayrı şəxslərə basqın etmə ağır nəticələrə səbəb olma) və digər maddələrilə cinayət işi başlanaraq ibtidai istintaqın aparılması Baş Prokurorluğun istintaq idarəsinə həvalə edilib.

Hazırkı şəraitdə prokurorluq əməkdaşları tərəfindən mümkün olan istintaq hərəkətləri aparılır.