Naxçıvan MR Şərur rayonu Mahmudkənd kəndinin əhalisinin birgə qərarı ilə yas mərasimlərində ehsan verilməsi qadağan edilib. 10 sentyabr tarixindən etibarən kənd ərazisindəki 3, 7 və 40 mərasimlərində ehsan verilməyəcək. Əvəzində isə başsağlığına gələnlər üçün yalnız çay süfrəsi açılacaq.

Həmçinin xüsusi vurğulanıb ki, hər hansı kənd sakini bu qaydanı pozarsa, həmin şəxsin keçirdiyi yasda sakinlər iştirak etməyəcək.

Bəs belə bir qadağanın qəbul olunmasına səbəb nə olub?

Məsələ ilə bağlı Naxçıvan MR Şərur rayonu Mahmudkənd kəndinin sakini Arif Nağıyev Referans.az-a açıqlamasında bildirib ki, bu qərar kənd əhalisinin ortaq düşündüyü və qəbul etdiyi bir məsələdir:

“Birlikdə yığışıb belə bir qərar qəbul etdik ki, yas mərasimlərində verilən ehsanlar ləğv olunsun. Yəni hər hansı bir yas mərasimində üç, yeddi, qırx və ildə ehsan verilməyəcək. Bunu da bizim kəndin ağsaqqallarının təşəbbüsü ilə irəli sürüb, kənd camaatı da yetkinliklə buna rəy verib. Bu ayın 10-dan etibarən qərar qəbul olunub. Ölü yerlərində gələn yaxın qohumlara, qonaqlara sadəcə çay süfrəsi təşkil olunacaq”.

Arif Nağıyev bildirib ki, belə bir qərarın qəbul olunmasında əsas məqsəd yas mərasimlərində xərclərin qarşısını almaqdır. Onun sözlərinə görə, yas mərasimlərində ölü üçün həddindən artıq pul xərclənir: “Bir yas mərasimini yola vermək üçün xeyli pul sərf olunur. Sadəcə 3-ü yola vermək üçün 3 min, 4 min pul lazımdır. Bir gündə 10-15 kilo ət gedir, ehsan günü də heç olmasa 100 kilo ət verilməlidir. Biz demirik ki, yas mərasimləri ləğv olunsun. Sadəcə yas yerlərində daha ət yeməkləri verilməyəcək”.