Nazirlər Kabinetinin iyunun 25-də təsdiq etdiyi “Nəqliyyat vasitələrinin parklanmasına görə ödənişin məbləği”nin təsdiq edilməsi haqqında qərarına görə, paytaxt Bakı, Sumqayıt və Gəncə şəhərlərində qiymətlər müəyyən edilib. Belə ki, vətəndaşlar parklanma ilə bağlı bir sıra qanunu bilsələr də, çox sürücünün bilmədiyi bəzi qərarlar mövcuddur.

Bu məsələlərdən biri də parklanmanın pulsuz olduğu vaxtlar və alına bilən parklanma yerləri ilə bağlıdır.

Məsələ ilə bağlı danışan Azərbaycan Yerüstü Nəqliyyat Agentliyinin mətbuat xidmətinin rəhbəri Tural Orucov bildirib ki, parklanmanın pulsuz olduğu bir sıra vaxtlar mövcuddur:

“Şəhər mərkəzi ilə kənar yaşayış məntəqələrində yerləşən parklanma yerlərinə görə qiymətlərin diversifikasiyasını ehtiva edən qərara əsasən Bakı şəhəri üzrə 5 parklanma zonası müəyyən edilib və ödənişlər hər zonaya uyğun tətbiq edilir. 4-cü parklanma zonasına daxil edilən ərazilərdə parklanma ödənişsizdir. Eyni zamanda nəqliyyat vasitələrinin parklanmasına görə ödənişlərin məbləği barədə Nazirlər Kabinetinin qərarına əsasən nəqliyyat vəsitəsinin parklanması üçün saat 22:00-dan səhər saat 07:00-a qədər ödəniş tələb olunmur. Eləcə də, bazar günləri sürücülərin ödəniş etməsinə ehtiyac yoxdur”.

Həmçinin parklanmaya yaxın ərazilərdə yaşayan vətəndaşlar təşkil edilmiş parklanma yerindən hər iki istiqamətdə yolun hər iki kənarı boyu 100 metr məsafədə yerləşən ev və ya binalarda yaşayan sakinlər müraciət edərək fərdi parklanma talonları ala və həmin parklanma yerlərindən ödənişsiz istifadə edə bilərlər – deyə AYNA rəsmisi qeyd edib.|referans.az|