Beynəlxalq cinayət təşkilatının rəhbərlərindən biri olduğu iddia edilən Gürcüstan əsilli Quram Çixladze həbs edilib.

44gun.az xəbər verir ki, bu barədə Türkiyə KİV-ləri məlumat yayıb.

Çixladzenin Beşiktaşda silahlı basqın nəticəsində öldürülən azərbaycanlı cinayətkar, təşkilat lideri Rövşən Canıyevin qardaşı Namiq Canıyevin rəhbərlik etdiyi “Canıyev cinayət dəstəsi” kimi tanınan qruplaşmanın rəhbərlərindən biri olduğu müəyyən edilib.

Cinayətkarın Rusiya və Azərbaycandakı təşkilat üzvlərinə və təşkilat adından həyata keçirilən aksiyalara rəhbərlik etdiyi, zirehli texnikalarda silahlı mühafizəçilərin müşayiəti ilə Türkiyədə səfərlər etdiyi məlum olub.

Xatırladaq ki, mətbuatda gedən məlumatlara görə, mərhum “Qanuni oğru” Lotu Quli (Nadir Səlifov) 2012-ci ildə gürcü “qanuni oğru” Quram Çixladzeni döydürüb. 35 yaşlı Çixladzenin Rövşən Lənkəranskinin qohumları ilə sıx dostluq münasibətlərində olması Lotu Qulini qəzəbləndirib və ona xəbərdarlıq edib.

Onların Türkiyədə baş tutan görüşü zamanı Quram Çixladze Nadir Səlifovun fikirlərini qəbul etmədiyini və Rövşən Lənkəranskinin qohumları ilə dost qalacağını deyib.
Lotu Qulinin həmin görüşdə iştirak edən tərəfdaşı Arman adlı şəxs gürcü avtoriteti döyüb. Çixladze təhlükə ilə üz-üzə qaldığını görüb, oradan uzaqlaşıb və İsrailə uçubmuş.

“Kutaisi kriminal qruplaşması”nın əsas simalarından biri sayıldığından bu hadisənin ciddi kriminal müharibəyə səbəb olacağı düşünülmüşdü.