İran polisi saçlarını örtməyən qadınları müəyyən etmək üçün ictimai yerlərdə kameralar quraşdırmağa başlayıb.

44GÜN.AZ  BBC-ə istinadla xəbər verir ki, İran polisindən verilən məlumata görə, belə qadınlar başı açıq küçəyə çıxmağın “nəticələri ilə bağlı” xəbərdarlıq mətnləri alacaqlar.

"Bu hicab qanununa qarşı müqavimətin qarşısını almağa kömək edəcək", - deyə İranın hüquq-mühafizə orqanlarından bildirilib.

Qeyd edək ki, İrandan qadınların hicab taxmamaqla bağlı kütləvi etirazlarına səbəb keçən il hicab qaydasını pozduğu iddiası ilə həbs edilən gənc qadın Məhsa Əmininin polis nəzarətində ölməsi olub.

Əmininin ölümündən sonra, həbs olunma riskinə baxmayaraq, getdikcə daha çox qadın, xüsusən də böyük şəhərlərdə baş örtüyünü atıb.

İslam Respublikası Dövlət Xəbər Agentliyi tərəfindən dərc edilən polis bəyanatında deyilir ki, sistem “hicab qanununu pozanları” müəyyən etmək və onlara xəbərdarlıq göndərmək üçün “ağıllı” kameralar və digər vasitələrdən istifadə edir.

Qeyd edək ki, 1979-cu il İslam İnqilabından sonra dini qanunların sərt təfsiri tətbiq edilib və qadınların qanuni olaraq saçlarını hicabla (çadra) örtmələri barədə göstəriş verilib. Qanunu pozan qadınları cərimə və ya həbs gözləyir. /yeniavaz.com/