“Rusiya qonşu Belarusda taktiki nüvə silahı yerləşdirmək üçün müqavilə bağlayıb, lakin nüvə silahlarının yayılmaması haqqında sazişləri pozmayacaq”.
44gun.az xəbər verir ki, bunu Rusiya Prezidenti Vladimir Putin “Rossiya-24” telekanalına müsahibəsində bildirib.
O qeyd edib ki, Belarus Prezidenti Aleksandr Lukaşenko uzun müddətdir Polşa ilə həmsərhəd olan Belarusda taktiki nüvə silahının yerləşdirilməsi məsələsini qaldırıb.
“Burada qeyri-adi heç nə yoxdur. Birincisi, ABŞ bunu onilliklərdir ki edir. Onlar uzun müddətdir ki, öz taktiki nüvə silahlarını müttəfiq ölkələrinin ərazisində yerləşdiriblər. Razılaşdıq ki, nüvə silahlarının yayılmaması ilə bağlı beynəlxalq öhdəliklərimizi pozmadan biz də eyni şeyi edəcəyik”, - Putin əlavə edib.
Putin bildirib ki, Rusiya iyulun 1-də Belarusda taktiki nüvə silahları üçün anbarın tikintisini başa çatdıracaq: “Moskva faktiki olaraq silahlara nəzarəti Minskə ötürməyəcək”.
Həmçinin o deyib ki, Rusiya Belarusda taktiki nüvə silahı daşıya bilən 10 təyyarə yerləşdirib: “Moskva artıq Belarusa nüvə silahının buraxılması üçün istifadə oluna bilən bir sıra “İsgəndər” taktiki raket kompleksləri verib”.