Sosial şəbəkələrdə və mediada bu gün Qarabağda baş verən silahlı insidentin foto və video materialları yayılıb .

Xatırladaq ki, Xankəndi-Xəlfəli-Turşsu torpaq yolu ilə Ermənistandan Rusiya sülhməramlı kontingentinin müvəqqəti yerləşdirildiyi Azərbaycana hərbi texnika, sursat və canlı qüvvənin keçirilməsi barədə Azərbaycan Müdafiə Nazirliyinə əməliyyat məlumatı daxil olub. Martın 5-də səhər saatlarında daxil olan məlumatın dəqiqləşdirilməsi məqsədilə Azərbaycan ordusunun bölmələri tərəfindən nəqliyyat vasitələrinin saxlanmasına və yoxlanılmasına cəhd edilib .

Qarşı tərəf atəş açıb. Qanunsuz erməni birləşmələrinin törətdiyi təxribat nəticəsində Azərbaycan ordusunun hərbi qulluqçuları Əlibəyli Şəhriyar Ramiz oğlu və Hüseynov Eşqin Cəmil oğlu həlak olub.

Ermənistan mətbuatının məlumatına görə, Azərbaycanın antiterror əməliyyatı nəticəsində üç qondarma separatçı “polis” zabiti ləğv edilib: polkovnik-leytenant Armen Mayoroviç Babayan, mayor David Valeryeviç Danielyan, leytenant Ararat Telmanoviç Qasparyan. Fotoda Rusiya sülhməramlı qüvvələrinin üzvlərinin separatçılara necə kömək etməyə çalışdığı əks olunub.