"İmişli rayonu Aranlı kənd tam orta məktəbində sanitar su qovşağı problemi ilə bağlı ibtidai sinif müəllimi Leyla Nəcəfquliyevanın sosial şəbəkələrdə yaydığı video görüntülər ictimaiyyətin diqqətini çəkib və müzakirələrə səbəb olur.

Elm və Təhsil Nazirliyi yanında İctimai Şura olaraq məsələ ilə bağlı  nazirliyə sorğu göndərilib və Mil-Muğan Regional Təhsil idarəsinin açıqlaması müzakirə edilib. Məlumatda qeyd edildiyi kimi, məktəb  qəzalı vəziyyətdə olduğundan, 2023-cü ildə yeni məktəb binasının layihələndirilmə işlərinə başlanılacaq. Ümid edirik ki, məktəb binasının yenilənməsi şagirdlərin daha təhlükəsiz və rahat şəraitdə təhsil almalarına imkan yaradacaq".

Bunu İctimai Şuranın sədri Gūnel Səfərova deyib. O bildirib ki, açıqlamada qeyd olunan digər iddia ilə bağlı Leyla Nəcəfquliyevaya ( 7-8 dekabr 2022-ci il tarixlərində məktəb rəhbərliyinə heç bir məlumat vermədən üzrsüz səbəbdən iş yerinə gəlmədiyinə, əmək müqaviləsi üzrə müəyyən edilmiş vəzifə funksiyalarını və müəssisədaxili intizam qaydalarını pozduğuna görə Əmək Məcəlləsinin 186-cı maddəsinin 2-ci hissəsinin "a" bəndinə uyğun olaraq)  töhmət verilməsi məsələsi hüquqi araşdırma tələb edir və İctimai Şura tərəfindən müvafiq sənədlər araşdırıldıqdan sonra ictimayyətə daha ətraflı məlumat veriləcək: "Təhsilverənin  yaydığı videoda uşaqların təhsildən yayınması çağırışları qəbuledilməzdir. Həm təhsil verənin, həm də məktəb rəhbərliyinin əsas vəzifə öhdəliyi təhsil sahəsində dövlətin siyasətinin həyata keçirilməsində iştirak etməkdir. Həmçinin,  məktəb direktorunun vəzifəsi  təlim-tərbiyə işinin təşkili ilə yanaşı, inzibati təsərrüfat  işinin düzgün qurulmasına cavabdehlik daşımasıdır.

İctimai Şura olaraq təhsil siyasətinin formalaşmasında, proqramların icrasında və təhsillə bağlı mövzularda ictimai müzakirələrə açığıq".

Xəzər