Bu ilin yanvar ayında Azərbaycana xaricdən 6 min 881 ədəd müxtəlif təyinatlı avtomobil idxal olunub.

Ölkəyə gətirilən avtomobillərin ümumi gömrük dəyəri 102 milyon 620,6 min dollar olub. Nəticədə ölkəyə idxal olunan bir ədəd avtomobilin orta gömrük dəyəri 14 min 914 dollar (25 min 353 manat) olub.
Müqayisə üçün bildirək ki, ötən ilin eyni dövründə ölkəyə daha az – 5 min 685 ədəd avtomobil gətirilib.

Bu ilin yanvar ayı ərzində Azərbaycana 6 min 458 ədəd minik avtomobili, 20 ədəd sürücü daxil olmaqla 10 nəfər və ya daha çox adam daşımaq üçün nəzərdə tutulmuş motorlu nəqliyyat vasitəsi, 376 ədəd yük daşımaq üçün motorlu nəqliyyat vasitəsi, 27 ədəd xüsusi təyinatlı motorlu nəqliyyat vasitəsi idxal olunub.

Bundan başqa xaricdən 933 ədəd daxili yanma mühərriklə yanaşı elektrik mühərriklə də hərəkətə gətirilən nəqliyyat vasitəsi (hibrid), 119 ədəd yalnız elektrik mühərriklə hərəkətə gətirilən nəqliyyat vasitəsi gətirilib.

Hibrid avtomobillərin 1 ədədinin orta gömrük dəyəri 22 min 572 dollar (38 min 373 manat) olub.

Diqqət çəkən məqamlardan biri də idxal olunan hibrid avtomobillərin dəyərinin kəskin artmasıdır. Qeyd edək ki, ötən ilin ilk ayında hibrid avtomobillərin dəyəri builkindən təxminən 2 dəfədən çox aşağı olub - 9 min 33 dollar (15 min 356 manat). İdxal olunan hibrid avtomobillərin dəyəri artsa da, sayı ötən illə müqayisədə azalıb./yeniavaz.com/